ФИФА Испания қироллик футбол федерацияси (RFEF)га мактуб йўллаб, трансфер регламентига ўзгартириш киритишни тилаб қилди.

Халқаро футбол ассоциациялари федерациясининг фикрича, Испанияда ўйинчиларнинг жароҳати туфайли трансфер муддатидан ташқарида футболчиларни рўйхатдан ўтказишга йўл қўйиш керак эмас.

«Барселона» 20 февраль куни «Леганес» ҳужумчиси Мартин Брэйтуэйтни 18 миллион еврога сотиб олгани учун ФИФА шундай талабни илгари сурмоқда. "Кўк-анорранглилар" ҳужумчилари Луис Суарес ва Усмон Дембеле жароҳат олиб узоқ вақтга сафдан чиқишгани боис, Испания профессионал лигаси каталонияликларга янги футболчи сотиб олиш учун рухсат берган эди.

Испания чемпионатида жон сақлаб қолиш учун кураш олиб бораётган «Леганес»га эса йўқотишнинг ўрнини қоплаш учун имкон берилмади.

ФИФА ушбу мавсум якунланганидан кейин ушбу қоидани бекор қилишни талаб қилди. Аввалроқ, 2016 йилда ҳам ташкилот RFEF'дан буни талаб қилган эди, аммо ўшанда ҳам бу қоида ўз кучида қолган эди.