Тошкентнинг “Локомотив” жамоаси ҳимоячиси Даврон Ҳошимов “Андижон”га қараши учрашувдан сўнг ўз фикр ва мулоҳазалари билан ўртоқлашди.

- Даврон ўйин ҳақидаги таассуротларингиз?

- Тўғриси, бугун биз ўзимиз кутгандан ҳам кучлироқ рақиб билан майдонда кураш олиб бордик. Мавсумнинг илк ўйини бўлгани учун кўплаб вазиятларда бизга совуққонлик етишмади. Қувонарлиси ўзимиз яратган вазиятлардан унумли фойдаландик ва муҳим уч очкони қўлга киритдик. Айни дамда жамоа ўзининг оптимал формасида эмас. Шу сабабли бугунги ўйинда мухлисларимизга манзур келадиган футбол намойиш эта олмадик.

- “Локо” иккинчи бўлимда рақибга ўйинни бериши мураббийлар кўрсатмаси эдими? Ёки “Андижон” жисмонан сизлардан яхшироқ кўриндими?

- Биз ўйиндан келиб чиқиб иккинчи рақам билан ҳаракат қилдик. Биринчи бўлимда киритилган голлардан сўнг, ғалабани қўлдан чиқариб юбормаслик учун қарши ҳужумга таянган холда ҳаракат қилдик. Тўғри, сўнгги дақиқаларда рақиб ҳисобни тенглаштириши мумкин эди, бироқ бизда ҳам қарши ҳужумларда яхши вазиятлар бўлди. Агар улардан ҳеч бўлмаганда биттасини голга айлантирганимизда рақибнинг қаршилиги камайган бўлар эди.