Toshkentning “Lokomotiv” jamoasi himoyachisi Davron Hoshimov “Andijon”ga qarashi uchrashuvdan so‘ng o‘z fikr va mulohazalari bilan o‘rtoqlashdi.
- Davron o‘yin haqidagi taassurotlaringiz?
- To‘g‘risi, bugun biz o‘zimiz kutgandan ham kuchliroq raqib bilan maydonda kurash olib bordik. Mavsumning ilk o‘yini bo‘lgani uchun ko‘plab vaziyatlarda bizga sovuqqonlik yetishmadi. Quvonarlisi o‘zimiz yaratgan vaziyatlardan unumli foydalandik va muhim uch ochkoni qo‘lga kiritdik. Ayni damda jamoa o‘zining optimal formasida emas. Shu sababli bugungi o‘yinda muxlislarimizga manzur keladigan futbol namoyish eta olmadik.
- “Loko” ikkinchi bo‘limda raqibga o‘yinni berishi murabbiylar ko‘rsatmasi edimi? Yoki “Andijon” jismonan sizlardan yaxshiroq ko‘rindimi?
- Biz o‘yindan kelib chiqib ikkinchi raqam bilan harakat qildik. Birinchi bo‘limda kiritilgan gollardan so‘ng, g‘alabani qo‘ldan chiqarib yubormaslik uchun qarshi hujumga tayangan xolda harakat qildik. To‘g‘ri, so‘nggi daqiqalarda raqib hisobni tenglashtirishi mumkin edi, biroq bizda ham qarshi hujumlarda yaxshi vaziyatlar bo‘ldi. Agar ulardan hech bo‘lmaganda bittasini golga aylantirganimizda raqibning qarshiligi kamaygan bo‘lar edi.
