Иорданиянинг Амман шаҳрида бокс бўйича Осиё/Океания минтақалари учун ўтказилаётган лицензион мусобақанинг ярим финал босқичи доирасидаги кечки жанглар бўлиб ўтмоқда.

57 кг. вазнда ўзбекистонлик жаҳон чемпиони Миразизбек Мирзахалилов финал йўлланмаси учун қозоғистонлик Серик Темиржановга қарши рингга кўтарилди.

Биринчи раундда қўшни юрт вакили асосан ринг бўйлаб қочди ва қарши ҳужумда зарба беришга интилди. Унинг бу услуби ўз самарасини берди ва ҳакамлар биринчи бўлимдан сўнг ўз овозларини Темиржановга беришди.

Иккинчи бўлимдан бошлаб Мирзахалилов тажовузкорликни оширган бўлса, Серик жисмоний жиҳатдан чарчаб қола бошлади. Натижада сўнгги раунд олдидан ҳисоб тенглашди.

Учинчи раундда ҳам боксчимиз аниқ зарбалар сонини оширди. Ҳаттоки, жанг тугашига 15 сония қолганида ҳакам Темиржановни нокдаунга тушганини қайд этди. Ҳакамларнинг якуний баҳолари — 5:0 (29:28, 29:28, 29:28, 29:28, 29:27).

Шу тариқа, Аммандаги турнирда Ўзбекистоннинг иккинчиси боксчиси финал йўлланмасини қўлга киритди. Кундузги дастурда Элнур Абдураимов (63 кг.) ярим финал жангини ғалаба билан якунлаган эди.

Бироздан Баҳодир Жалолов (91+ кг.) ҳиндистонлик Кумар Сатишга қарши рингга кўтарилади.