Iordaniyaning Amman shahrida boks bo‘yicha Osiyo/Okeaniya mintaqalari uchun o‘tkazilayotgan lisenzion musobaqaning yarim final bosqichi doirasidagi kechki janglar bo‘lib o‘tmoqda.

57 kg. vaznda o‘zbekistonlik jahon chempioni Mirazizbek Mirzaxalilov final yo‘llanmasi uchun qozog‘istonlik Serik Temirjanovga qarshi ringga ko‘tarildi.

Birinchi raundda qo‘shni yurt vakili asosan ring bo‘ylab qochdi va qarshi hujumda zarba berishga intildi. Uning bu uslubi o‘z samarasini berdi va hakamlar birinchi bo‘limdan so‘ng o‘z ovozlarini Temirjanovga berishdi.

Ikkinchi bo‘limdan boshlab Mirzaxalilov tajovuzkorlikni oshirgan bo‘lsa, Serik jismoniy jihatdan charchab qola boshladi. Natijada so‘nggi raund oldidan hisob tenglashdi.

Uchinchi raundda ham bokschimiz aniq zarbalar sonini oshirdi. Hattoki, jang tugashiga 15 soniya qolganida hakam Temirjanovni nokdaunga tushganini qayd etdi. Hakamlarning yakuniy baholari — 5:0 (29:28, 29:28, 29:28, 29:28, 29:27).

Shu tariqa, Ammandagi turnirda O‘zbekistonning ikkinchisi bokschisi final yo‘llanmasini qo‘lga kiritdi. Kunduzgi dasturda Elnur Abduraimov (63 kg.) yarim final jangini g‘alaba bilan yakunlagan edi.

Birozdan Bahodir Jalolov (91+ kg.) hindistonlik Kumar Satishga qarshi ringga ko‘tariladi.