Бугун ЕЧЛ 1/8 финали доирасида “Энфильд”да жанг бўлади. Ҳақиқий жанг. Бугун нафақат бугуннинг кучли клублари, балки, кучли мураббийлари ҳам ўзаро тўқнаш келади.
Ўйин олдидан “Атлетико”нинг имкониятларини юқорироқ баҳолаш мумкин. Биринчидан, Симеоне шогирдлари Мадриддаги жангда ғалаба қозонишган. Шунингдек, ўз уйларида гол ўтказишмади.
Жавоб ўйинида вазият оддий: агар “матрасчилар” меҳмонда амаллаб гол ура олишса, “Ливерпул” камида учта гол уришига тўғри келади. “Атлетико”нинг-ку битта гол уришига ишониш мумкин, агар Симеоне шогирдлари бу ишни уддалашса, “қизиллар”нинг учта тўп киритиши анча мушкуллашади.
Вазиятга бошқа томондан ёндашсак. Ўйиннинг сценарийси маълум: “Ливерпуль” гол уришга мажбур. Демакки, Юрген Клопп ўша “уч мушкетёр”ни жангга ташлайди. Диего Симеоне эса ўзи хуш кўрадиган ва ҳадисини олган “ҳимоядан ҳужумга” тактикасида ҳаракат қилади. Симеоне Моуриньо эмас ҳимояни қойиллатиб, ҳужумнинг эпини қилолмайдиган. У ҳам ҳимояни, ҳам ҳужумкорликни эплай оладиган мутахассис. “Атлетико”нинг Ла Лигадаги ҳолатига эътибор берманг. “Атлетико” шундай жамоаки, Ла Лигада чемпионлик учун кураша олмай қолган бир пайтда ЕЧЛ финалига қадар етиб боради. Чунки Симеоне захирасидаги куч ҳар иккала турнирда бирдек иштирок этиш имконини бермайди. Ўз ўрнида аргентиналик мутахассис Ла Лигада чемпион бўлиш ишқида-ку ёняпти, аммо бу ЕЧЛга бўлган муҳаббат олдида бироз ҳароратсизроқ. Ҳар ҳолда, жорий мавсумда. Сабаби, Симеоне “Атлетико” бу мавсумда Ла Лигада чемпион бўла олмаслигини тушуниб турибди, шу боис бор эътиборини ЕЧЛга, айни дамда “Ливерпул”га қаратган.
Агар “Атлетико”нинг ўрнида бошқа жамоа, ҳатто “Манчестер Сити” ёки “Барселона” бўлганида ҳам “Ливерпуль”нинг кейинги босқичга чиқиш имкониятларини яхшироқ баҳолаш мумкин эди. Лекин “Атлетико” бошқа масала.
Бугун “Энфильд”да ҳужумнинг ҳадисини олган ва ҳимоявий фалсафани мукаммал яратишга интилаётган мураббийлар тўқнашади. Таркибларга қарамаймиз, натижаларга қарамаймиз, клубларнинг бугунги ҳолатига ҳам қарамаймиз. Энг муҳим жиҳат шу — Клопп ва Симеоне. Бундай мураббийлар ўртасидаги ҳар қандай ўйин футболнинг безаги бўлади, айниқса, у ҳал қилувчи ўйин бўлса.
Хуллас, бугун тунги бирда ҳақиқий жанг бошланади. Ухлаш йўқ, ўйин бунга арзийди ҳам.
Низомжон ИСЛОМОВ
