БАТЭ, «Арсенал», «Барселона» ва «Крылья Советов» клублари собиқ футболчиси Александр Глеб коронавирус даврида давом этаётган Белоруссия чемпионати ҳақида фикрларини билдирди.

— Ҳозир Белоруссияда гўзаллик. Бутун дунё бизнинг чемпионатимизни кузатмоқда. Бундан завқ олишяптими ёки йўқми билмайман. БАТЭга нима бўлди? Менинг фикримча, футболчилар ўзларига бўлган ишончни йўқотиб қўйишди, улар жозибали ўйин намойиш эта олишмаяпти. Эҳтимол совринлар ва ғалабаларга тўйишгандир. Бу руҳият. Улар машғулотларга яхши меҳнат қилишмоқда, шифокорлар ҳар куни улардан тест олади. Балки, қандайдир қўрқув бордир, буни билмайман. Чунки, мен клубни ичида эмасман, — деди Глеб «Все на футбол!» дастурига берган интервьюсида.