Шанба куни Италияда мавсум-2019/20 ғолиблигини «Аталанта» клубига бериш борасида Change.org сайти орқали овоз йиғиш бошланди.

Петиция муаллифининг фикрига кўра, «Аталанта»нинг сўнгги икки мавсумдаги кўрсатган спорт натижаларига асосан, қолаверса, коронавирусдан энг кўп жабр чеккан Бергамо шаҳрининг ҳурмати эвазига Скудеттони бериш таклифи ўртага ташланган.

Бергамо шаҳрида 120 мингга яқин аҳоли истиқомат қилади, сўнгги ойда шаҳарда коронавирус сабабли 4500 нафардан зиёд инсон оламдан кўз юмди. Умуман олганда Италияда ушбу пандемиядан ҳалок бўлганлар сони 15 362 тани ташкил этмоқда, уларнинг 8656 нафари Ломбардия вилоятидан.

Айни пайтда турнир жадвалини «Ювентус» клуби 63 очко билан бошқариб турибди. «Лацио» 62 очко билан иккинчи, учинчи ўринда бораётган «Интер» ҳисобида эса 54 очко бор.
«Аталанта» 48 очко билан тўртинчи поғонани банд этиб турибди.

"Аталанта" клуби жорий мавсумда ЕЧЛда Испаниянинг «Валенсия» клубини мағлуб этиб, чорак финалга йўл олди.