Shanba kuni Italiyada mavsum-2019/20 g‘olibligini «Atalanta» klubiga berish borasida Change.org sayti orqali ovoz yig‘ish boshlandi.

Petisiya muallifining fikriga ko‘ra, «Atalanta»ning so‘nggi ikki mavsumdagi ko‘rsatgan sport natijalariga asosan, qolaversa, koronavirusdan eng ko‘p jabr chekkan Bergamo shahrining hurmati evaziga Skudettoni berish taklifi o‘rtaga tashlangan.

Bergamo shahrida 120 mingga yaqin aholi istiqomat qiladi, so‘nggi oyda shaharda koronavirus sababli 4500 nafardan ziyod inson olamdan ko‘z yumdi. Umuman olganda Italiyada ushbu pandemiyadan halok bo‘lganlar soni 15 362 tani tashkil etmoqda, ularning 8656 nafari Lombardiya viloyatidan.

Ayni paytda turnir jadvalini «Yuventus» klubi 63 ochko bilan boshqarib turibdi. «Lasio» 62 ochko bilan ikkinchi, uchinchi o‘rinda borayotgan «Inter» hisobida esa 54 ochko bor.
«Atalanta» 48 ochko bilan to‘rtinchi pog‘onani band etib turibdi.

"Atalanta" klubi joriy mavsumda YECHLda Ispaniyaning «Valensiya» klubini mag‘lub etib, chorak finalga yo‘l oldi.