Англия терма жамоаси ва "Манчестер Юнайтед" клубининг собиқ футболчиси Уэйн Руни Буюк Британия Соғлиқни Сақлаш Вазири Мэтт Хэнкокни кескин танқид қилди.
Сабаби, Хэнкок коронавирусга қарши курашишда футболчиларнинг маошларини қисқартириш таклифи билан чиққанди.
"Агар ҳукумат мендан ҳамшираларни қўллаб-қувватлаш ёки тиббий усканалар олиб беришни сўраса, бундан ғурурланган бўлардим. Мен баъзи бир нарсалардан воз кечиш имкониятига эгаман. Лекин, ҳамма футболчи ҳам мендек шароитга эга бўлмаслиги мумкин. Сўнгги бир неча кунда содир бўлган воқеалар шунчаки - шармандалик.
Нега футболчилар тўсатдан ёдга тушиб қолишди? Тўсатдан улар маошларининг 30 фоизидан воз кечишлари керак? Соғлиқни Сақлаш Вазири Мэтт Хэнкок ҳаллқа ҳаётимиздаги энг жиддий инқироз ҳақида сўнгги хабарларни етказиб туриши керак эди. Нега футболчиларнинг маошлари унинг хаёлига келиб қолди? У ҳақиқатдан ҳам ҳукумат эътиборини пандемия билан чалғитмоқчи бўлганми?" - Рунининг сўзларидан иқтибос келтирмоқда standard.co.uk.
