Stadion.uz айни дамда дунёнинг энг кучли марказий ҳужумчиларидан ташкил топган кучли ўнликни эътиборингизга ҳавола этади.
10-ўрин. Жейми Варди («Лестер»; Англия)
Бугунги рўйхатимизни “Лестер”нинг аллақачон афсонасига айланиб бўлган Жейми Варди очиб беради. Кўпчилик бу ерда Агуэронинг бўлишини тахмин қилгани рост, бироқ Варди ва Серхионинг андай шароитда тўп сураётганини солиштириб кўринг! Жейми Агуэродан фарқли ўлароқ, сўнгги зарбани йўлловчи ҳужумчи бўлмай туриб ҳам АПЛда 19 та гол киритишга муваффақ бўлди. Шундай экан, айни дамда у сайёрамиздаги энг кучли ҳужумчилар ўнлигида бўлишга ҳақли.
9-ўрин. Пьер-Эмерик Обамеянг («Арсенал»; Габон)
Габонлик ҳужумчининг сермаҳсулигига қойил қолмасликка иложимиз йўқ. Аслида унда тўпурарлар пойгасида Вардини ортда қолириш мумкин эди, бироқ Артета қаҳрамонимиздан турли нуқталарда фойдалангани учун голлар сони камайиб кетди.
8-ўрин. Луис Суарес («Барселона»; Уругвай)
Жароҳат олган, мавсумни деярли ўтказиб юборган футболчи қандай қилиб 8-ўринни эгалди дейсизми? Унинг ҳужумчилик маҳоратига эътибор қаратинг! Месси сингари инжиқ футболчи билан майдонда бир тана бўлиб ҳаракат қилаётгани, марказий ҳужумчисиз ҳаракат қилувчи ўйин фалсафаси билан уйғунлашиб кетган ҳужумчини “Барселона” ўрнини Лаутаро билан тўлдиришга қанчалар уринмасин бу осон бўлмаслиги аниқ. Жароҳатига қадар 14 та гол ва 9 та ассистни амалга оширган уругвайлик ҳужумчи агар Чемпионлар лигаси плей-офф босқичида сафга қайтса, “Барселона”да чемпионлик учун имконият янада ортиб кетади.
7-ўрин. Харри Кейн («Тоттенхэм»; Англия)
Яна бир лазаретдаги иқтидорли ҳужумчилардан бир. Кейн бугунги рўйхатимиздаги бирорта ҳужумчидан қолишмайдиган даражада иқтидорли. Боз устига, унинг меҳнаткашлигини ҳам инобатга олсак, у ўзишининг чинакам устаси дея оламиз. У Почеттино жамоадан кетгач ҳам 6 та гол ва 5 та ассистни амалга оширишга улгуриб қолди. Жозе Моуриньонинг талабларига жавоб бериш орқали шунча фойдали ҳаракат қилишни уддалаган ҳужумчига қойил қолмасликнинг иложи йўқ.
6-ўрин. Эрлинг Холанд («Боруссия» Д; Норвегия)
Дортмунд клубининг янги футболчиси шу қадар кучли мавсум ўтказаётган эдики, унга фантастик ҳужумчиларни рўйхатда ортда қолдириш насиб этди. Қаҳрамонимиз бир йилда иккита клубда тўп сурганига қарамай, ўзини йўқотиб қўйгани йўқ. Бежизга унинг учун узундан узоқ грандлар навбати пайдо бўлмаган.
5-ўрин. Роберто Фирмино («Ливерпуль»; Бразилия)
Ўтган мавсумда ЕЧЛда зафар қучган ҳужумчи деярли мукаммал мавсумни ўтказган эди. Ўтган мавсумда жарима майдончаси ичида ҳаракат қилиш борасида фақатгина Салоҳдан ортда қолган ҳужумчининг формаси тўлиқ тикланганича йўқ. Юзага келган пауза Фирмино учун қўл келиши мумкин.
4-ўрин. Ромелу Лукаку («Интер»; Бельгия)
Мактабда ўқиб юрган чоғларидаёқ катта футболда ном қозонган бельгиялик ҳужумчи ўз вақтида клубини ўзгартирганини алоҳида эътироф этиш лозим. Катта ва бақувват ҳужумчиларга суянган ҳолда ҳужумга ўтишни хуш кўрувчи Конте Лукакудаги янги қирраларни очишни бошлаб юборган бир пайтда, корона-танаффус катта саҳнага чиқди. Ҳужумчилар учун АПЛда гол киритишдан кўра, А серияда дарвозани ишғол қилиш мушкулроқ эканлигини инобатга олсак, Лукаку киритган 17 та голнинг аҳамияти жуда катта эканлигини дарров англаймиз.
3-ўрин. Карим Бензема («Реал»; Франция)
Карим Роналду жамоани тарк этгач, ўзининг янги қирраларини намойиш этишни бошлади. Жиру билан ОАВ орқали жанжаллашиб ётган ҳужумчи бугунги кунда “Реал Мадрид” учун алмаштириб бўлмас футболчи сифатида эътироф этилмоқда. Сўнгги пасга эга кам сонли ҳужумчилардан бири бугунги кунда чинакамига майдонда “олов ёқмоқда”!
2-ўрин. Чиро Иммобиле («Лацио»; Италия)
Бугунги кундаги “Лацио”нинг ишончли ўйинлари айнан шу йигит билан боғлиқ. Индзаги жамоани Иммобиле атрофида шакиллантиргач, жамоа скудетто учун курашга киришиб кетди. 26 та учрашувда 27 та гол киритган футболчи “Олтин бутса” учун курашда яққол фоворит бўлиб турибди. Тўғри, Рим клубида Чиро пенальтиларни ҳам амалга оширади ва шубоис унинг голлари сони бироз кўпроқ. Шунга қарамай, унинг “Интер”га қарши учрашувда қаҳрамонлигини ёдга олинг! Чиро — айни дамда сайёрамиздаги энг кучли ҳужумчиларнинг бири.
1-ўрин. Роберт Левандовски («Бавария»; Польша)
Бугунга келиб Роберт ва Чиро деярли бир ҳил нуқтада турибди. Иккиси ҳам узоқ кутилган “Олтин бутса”га жуда яқин. Шунга қарамай, Левандовскининг чинакам гол машинасини эканлигини инобатга олсак, катта эҳтимол билан польшалик футболчи пойгада италиялик амплуадошини қувиб ўтади. Эътиборли шундаки, Левандовски “Бавария” оғир кунларни бошидан ўтказаётганда ҳам ўз стабиллигини намойиш этишдан чарчамади. Айни дамда 31 ёшни қаршилаган форвард дунё футболидаги энг кучли марказий ҳужумчи номига мутлақ мос келади.
