«Ювентус» ҳимоячиси Жоржо Кьеллини ўзининг автобиографик асарида «Реал» ҳимоячиси Серхио Рамосдан ҳайратланишини ёзган. Шунингдек, испаниялик футболчи томонидан Чемпионлар лигаси финалида Муҳаммад Салоҳга нисбатан ишлатилган услубга қойил қолганини таъкидлаган.

«Ливерпуль»га қарши бўлиб ўтган 2018 йилги финалда Рамос мисрлик футболчига жароҳат етказиб, рақиб футболчисининг 30-дақиқадаёқ майдонни тарк этишига сабаб бўлган эди.

«Рамос – жаҳоннинг энг яхши ҳимоячиси. Унинг тактик хатоси туфайли жамоа бир мавсумда 8-10та гол ўтказиб юборишини айтишади, аммо техник жиҳатдан у жуда зўр ўйинчи ҳамда у ҳужумчи бўлиши мумкин эди. Менда эса бундай қобилият йўқ.

Аммо у ҳеч кимда мавжуд бўлмаган иккита хусусиятга эга. У катта ўйинларда муҳим ролни бажара олади. Боз устига, унинг ҳаракатлари мантиққа бўйсунмайди. У ўта айёрлик билан рақибга жароҳат етказа олади.

ЕЧЛ-2018 финалида Салоҳга ишлатган услуби — шунчаки қойилмақом. У бу ишни атайлаб қилмаганини таъкидлаб келади. Аммо рақибнинг қўлини ушлаб олган ҳолда бундай йиқилиш 10тадан 9та ҳолатида футболчининг қўли синиши мумкинлигини у биларди», – деди Кьеллини.