Туриннинг «Ювентус» клуби ҳимоячиси Леонардо Бонуччи жамоанинг ҳозирги бош мураббийи Маурицио Сарри ва собиқ бош мураббийи Массимилиано Аллегриларни ўзаро таққослади.
Футболчининг сўзларига қараганда, икки мутахассис ҳам мураббийлик табиати бўйича фарқ қилади. Сарри тактик жиҳатдан кучли, Аллегри эса футболчиларни руҳан тайёрлай олади.
«Фарқлари бор. Аллегри кийиниш хонасида қандай бошқаришни, мавсумнинг энг қийин дақиқаларини енгишни билади. Беш йиллик фаолияти давомида у ўзини бу масалаларда уста эканлигини кўрсата олди. Сарри - эҳтиёткор, тактикага иштиёқи юқори, ўз жамоасини яхши ўйин намойиш этишини яхши кўрадиган мураббий», - деди Бонуччи.
