Британиялик депутатлар «Ньюкасл» хўжайинининг ўзгаришига тўсқинлик қилишмоқчи. The Telegraph тарқатган хабарга кўра, парламентнинг 16 аъзоси Буюк Британия премьер-министри Борис Жонсонга мурожаатнома йўллаб, клубнинг Саудия Арабистони шаҳзодаси қўлига ўтишига қарши эканликларини маълум қилишди.
Сиёсатчилар валиаҳд шаҳзода Муҳаммад бин Салмоннинг фаолиятига баҳо бериб, уни 2018 йилда журналист Жамол Қошиқчини ўлдиртирганликда айблашди. Бундан ташқари, депутатлар Буюк Британиядан "спорт орқали ўз обрўсини тиклаш" воситаси сифатида фойдаланишга йўл қўймасликка чорлашди.
Аввалроқ «Ньюкасл»нинг ҳозирги хўжайини Майк Эшли ўз жамоасини Муҳаммад бин Салмон бошқарувидаги Саудия Арабистони инвестиция жамғармасига 300 млн фунт стерлингга сотиш борасида келишувга эришгани ҳақида хабар тарқалган эди.