Енгил вазн тоифасида UFC чемпиони Ҳабиб Нурмагомедовнинг менежери Али Абдулазиз жангчининг отаси — Абдулманап Нурмагомедовнинг аҳволи яхшиланаётгани ва тикланишидан далолат берувчи ижобий ўзгаришлар бўлаётганини маълум қилди.

«Ҳабиб кучли инсон. Унинг оиласи ва отаси ҳақида ҳам шундай дейиш мумкин. Унинг аҳволи яхшиланмоқда. У кўзини очди, бироз қимирлади — бу яхши белгидир. Яратганнинг ўзи вазиятни назорат қилмоқда. Барчамиз унинг соғайишига ишонамиз. Ҳозирда ҳамма нарса фақат унинг соғлиғига боғлиқ. Аммо у соғаймоқда ва барчамиз бундан жуда хурсандмиз», — дейди Али Абдулазиз.

Эслатиб ўтамиз, 57 ёшли Абдулманап Нурмагомедов бир неча ҳафта давомида Москвадаги касалхоналардан бирида даволанмоқда, шифокорлар унинг аҳволини оғир дея баҳолаган. Россияда хизмат кўрсатган мураббий нафақат ўғли, балки Россиянинг бир қатор таниқли UFC жангчилари билан ҳам ҳамкорлик қилади. Мутахассис 25 апрель куни Доғистондаги шифохоналардан бирига пневмония ташхиси билан ётқизилганди. 3 май санасида эса аҳволи оғирлашгани сабабли Москвага олиб борилган.