Испания чемпионатининг сўнгги тур ўйинларига томошабинларнинг киришига рухсат берилиши мумкин.
"El Mundo Deportivo" тарқатган хабарга кўра, Испания ҳукумати стадионларга мухлисларнинг кириши билан боғлиқ чекловни бекор қилиш борасида қарор тайёрламоқда. У 29 июнь санасидан кучга кириши мумкин.
Агар бу режа рўёбга чиқса, 30 июнь санасидан бошланадиган Ла лиганинг 33-тур баҳсларига ишқибозлар кириш имкониятига эга бўлишади. Маълумотларга қараганда, стадионнинг 30 фоизи томошабинлар билан тўлишига ижозат берилади. Шу тариқа, 1 июль куни бўлиб ўтадиган «Барселона» — «Атлетико» баҳсига 30 минг киши ташриф буюриши мумкин.
Испания соғлиқни сақлаш вазирлиги ва Испания футбол федерацияси томонидан имзоланган қарорга кўра, Ла лиганинг ушбу мавсуми охиригача барча ўйинлар томошабинларсиз ўтказилиши белгилаб қўйилган эди.