Италия кубогининг дастлабки финалчиси аниқ бўлди. Бу — "Ювентус".

"Милан" ярим финал босқичи доирасидаги дастлабки ўйиннинг энг сўнгги дақиқасида VAR белгиланган пенальти туфайли ғалабани қўлдан чиқади.

Видеоёрдамчи ҳакам бу сафар ҳам "россонери"нинг зарарига қарор чиқарди. Баҳснинг 16-дақиқасида белгиланган пенальтини Криштиану Роналду аниқ амалга ошира олмади. Унинг зарбасидан сўнг тўп устунга тегиб қайтди.

Ушбу лаҳзанинг ўзида ҳужумга ўтаётган миланликлар яна бир омадсизликка дуч келишди. Жамоа ҳужумчиси Анте Ребич оёғини баланд кўтариб, рақиб юзига тепиб юборди. Рефери уни дарҳол майдондан четлатди. Дарвоқе, биринчи учрашувда "Милан" футболчиси Тео Эрнандес қизил карточка олган эди.

Сафардаги гол қоидасига кўра, "Ювентус" олдинда бўлгани учун қолган дақиқаларда "Милан"га вазиятни ўнглаш осон бўлмади. Туринликлар тўп билан кўпроқ муомалада бўлишди. "Россонери" эса имкон бўлди дегунча қарши ҳужумдан фойдаланишга уринди. Аммо бугун жамоаларга дарвозани ишғол қилиш насиб этмади.

"Сан-Сиро"даги гол эса "Ювентус"ни Италия кубоги финалига олиб чиқди.

Италия кубоги, ярим финал, жавоб ўйини
Ювентус – Милан 0:0
Ювентус – Буффон, Данило (Куадрадо, 86), де Лигт, Алекс Сандро, Бонуччи, Матюиди (Рабьо, 62), Пьянич (Хедира, 62), Бентанкур, Дуглас Коста (Бернардески, 63), Роналду, Дибала.
Милан – Доннарумма, Конти (Салемакерс, 88), Калабрия (Лаксальт, 88), Романьоли, Кьер, Беннасер, Чалханоглу, Лукас Пакета (Коломбо, 82), Бонавентура (Рафаэл Леау, 52), Кессиэ (Крунич, 82), Ребич.
Огоҳлантиришлар: Конти (19), Пьянич (43), Хедира (74).
Четлатиш: Ребич (16).