Тошкентнинг «Локомотив» клуби ҳамда Ўзбекистон миллий жамоаси ҳимоячиси Олег Зотеев фаолиятида илк бор легионерга айланди. 

30 ёшли ўзбекистонлик футболчи Жанубий Корея Кей-лига-2 иштирокчиси «Чоннам Дрэгонз» клуби билан шартнома имзолади. Кваньян шаҳри жамоаси расмий сайтида ёзилишича, пандемия даврида Зотеевнинг Жанубий Кореягача етиб келиши осон бўлмаган. Футболчи икки ҳафталик карантинда бўлгач, бугун клуб томонидан расман таништирилди. 

«Кореяга келганимдан хурсандман. Анча вақтдан буён Жанубий Корея чемпионатини кузатардим. Бу лигада менга бегона бўлмаган ўзбекистонлик футболчилар тўп суришмоқда. Жамоага тезроқ мослашишга ва клубимга мақсадлари сари ёрдам беришга бор имкониятимни ишга соламан», - дея Олег Зотеевнинг сўзларини келтирмоқда клуб расмий сайти.

Маълумот учун, 1990 йилда туғилган Олег Зотеев фаолияти давомида «Пахтакор», «Олмалиқ», «Бунёдкор» ва «Локомотив» клубларида тўп сурган. «Чоннам Дрэгонз» клуби ҳозирда Кей-лига-2 турнир жадвалида 7 ўйиндан кейин 10 очко жамғариб, 6-ўриндан жой олиб турибди.