Бразилиянинг "Сантос" клуби 2013 йилда ўз футболчиси Неймарни "Барселона"га сотган эди. Ушбу клуб "кўк-анорранглилар" ҳужумчининг трансферини амалга оширишда айрим қаллобликларга қўл урган деб ҳисоблаб, 61 млн. 295 минг евро ундириш мақсадида Спорт арбитраж судига мурожаат қилган эди.

Суд эса барча ҳужжатларни ўрганиб чиқиб, "Барса" фойдасига қарор қабул қилди:

1. "Сантос" ва ўйинчи ўртасидаги шартнома томонларнинг ўзаро келишувига мувофиқ бекор қилинган.

2. "Барселона" мазкур трансфер доирасида Неймарнинг отаси ва "N&N" компаниясига тўлаб берган қўшимча мублағ қонунга хилоф эмас.

3. "Барса" Неймарнинг трансферини амалга оширишда "Сантос" ва футболчи билан дастлабки шартномани имзолаш пайтида қаллобликка қўл урмаган.

4. Суд харажатлари билан боғлиқ 18 минг евро миқдоридаги маблағни "Сантос" "Барселона" ҳисоб-рақамига ўтказиб беради.

Эслатиб ўтамиз, Неймар 2013 йилнинг июль ойида 88 миллион евро эвазига "Барселона"га ўтган эди. У 4 йил давомида каталонияликлар сафида 186та ўйинда майдонга тушиб, 105та гол урди ва 77та голга узатма берди. 2017 йилнинг август ойида у 222 миллион евро эвазига "ПСЖ" сафига ўтиб кетди.