9-тур доирасида бўлиб ўтган “Андижон” ҳамда “Сурхон” жамоалари ўртасидаги учрашувдан сўнг ўтказилган матбуот анжуманида “Андижон” жамоаси катта мураббийи Диёрбек Мирзабоев иштирок этди.

- Биринчи бўлим тўлиқ “Сурхон” жамоаси устунлигида ўтди. Иккинчи бўлимда ҳимоячимиз четлаштирилди. Бир нарсага тушунмадим, ёки биринчи бўлиб гол ўтказиб юборсак ёки бир киши кам бўлиб ўйнасак жамоа яхши ўйнайди шекилли. Футболчиларда иштиёқ кўринмади. “Сурхон” адолатли ғалабага эришди.

- “Андижон” нима учун ўз майдонида беш нафар ҳимоячи билан ўйнади?

- Бу саволни бош мураббийга беришимиз керак. Ҳозирги кундаги ҳолатимиздан келиб чиқиб ҳимоявий ўйин кўрсатяпмиз. Чунки, иккита марказий ҳимоячи билан ўйнасак рақиблар кўпроқ ҳужум уюштирмоқда. Шуни олдини олган ҳолда, ҳимоявий ўйин намойиш этяпмиз.

- Кумиковнинг иши қачон ҳал бўлади?

- Бу саволни раҳбариятга бериш керак.

- Жамоанинг ғалабасиз серияси салбий таъсир кўрсатмаяптими?

- Юта олмаган бўлсакда, сўнгги учта учрашувни дуранг ўйнадик. Йигитларни кайфиятлари яхши эди, муҳит ҳам яхши эди. Ушбу ўйинга тайёргарликни кўнгилдагидек кўргандик.