«Барселона» президенти Жозеп Мария Бартомеу жамоа бош мураббийи Кике Сетьен билан учрашиб, у билан гаплашиб олмоқчи.
Эслатиб ўтамиз, кеча, 16 июль бўлиб ўтган «Осасуна»га қарши баҳсда «кўк-анорранглилар» ўз майдонида 1:2 ҳисобида ютқазишди.
"Mundo Deportivo" тарқатган хабарга кўра, Бартомеу кечаги ўйиндаги мағлубият, умуман олганда эса, қўлдан чиқарилган соврин сабабларини билиш мақсадида мураббий билан кўришмоқчи. Манбага кўра, Сетьен бугун истеъфога чиқарилмайди. Аммо унинг 8 августга қадар ўз лавозимида қолишига ҳам ҳеч қандай кафолат йўқ.
Эслатиб ўтамиз, ўша куни «Барселона» Европа чемпионлар лигаси нимчорак финал босқичи доирасида «Наполи»га қарши жавоб учрашувини ўтказади (Неаполда ўтказилган ўйин 1:1 ҳисоби билан якунланган).
"Mundo Deportivo"да айтилишича, Кике Сетьеннинг лавозим курсиси қимирлаб турибди. Айниқса, Лионель Мессининг «Осасуна»га қарши ўйиндан кейин айтган фикрлари бунинг исботи бўла олади. Аргентиналик футболчи "ниманидир ўзгартириш керак, акс ҳолда «Наполи» тўсиғидан ўта олмаймиз", қабилида фикр билдирди.