Англиянинг "Манчестер Юнайтед" клуби собиқ футболчиси Уэйн Руни «Манчестер Сити» ҳамда «Реал» клубларининг ЕЧЛдаги ўйинидан олдинги фикрлари билан ўртоқлашди.
«Манчестер клублари энди Чемпионлар Лигасида ғалаба қозониш учун бундай имкониятларга эга бўлмасликлари мумкин. Турнингнинг амалдаги ғолиби чорак финалда қолиб кетди. «Бавария» аввалги йилларгадек кучли эмас деб ҳисоблайман. Қолаверса, «Сити» дастлабки турда «Реал»дан устун келган. Бу кейинги босқичга йўл олиш учун ажойиб имконият.
Хосеп Гвардиола «Манчестер Сити» билан ЕЧЛда ғолиб чиқишни хоҳлаётганини барчамиз яхши тушуниб турибмиз. Агар ушбу ғалаба қўлга киритилса, бу клубнинг ривожи учун олдинга ташланган қадам бўлади.
«Реал» клубига қарши жума куни бўлиб ўтадиган учрашув Англиянинг етакчи клуби учун муҳим аҳамият касб этади. Ўша куни Рамос ўйнамайди ва бу "Сити" учун устунликни беради. Майдон эгалари ўша куни майдонга ким хўжайин эканликларини ажратиб олишларига шубҳа қилмайман. Лекин, мени «шаҳарликлар»нинг ҳимояси хавотирга солмоқда, — деди Уэйн Руни.
