«Реал» ярим ҳимоячиси Рейньер 2020/21 йилги мавсумни ижарада ўтказиши мумкин. 18 ёшли бразилиялик футболчига Дортмунднинг «Боруссия» клуби қизиқиш билдирмоқда, дея хабар тарқатди "As" нашри.

Мадридликларнинг режасига кўра, Рейньер кейинги мавсумни "Қироллик клуби" сафида ўтказиши керак эди. Аммо коронавирус пандемияси туфайли 2019/20 йилги мавсум тақвимида юз берган ўзгаришлар натижасида футболчи "қаймоқранглилар" тизимига тўла мослашиб кета олмади. У «Кастилья» сафида 3та ўйинда майдонга тушиб, 2та гол урди.

Шу боис, «Реал» Рейньерни амбицияси юқори клубга ижарага бериб, унинг маҳоратини ўсишини таъминламоқчи. «Боруссия»дан ташқари бразилиялик футболчига «Байер» ва «Реал Сосьедад» клублари қизиқиш билдирмоқда.

Эслатиб ўтамиз, мадридликлар Рейньерни «Фламенго»дан 30 млн еврога харид қилишган эди.