АГМК Суперлигадаги мағлубиятсиз сериясини давом эттираётган ягона жамоа бўлиб турибди.
Ўтказилган 9 турда АГМК 6 ғалаба ва 3 дурангдан кейин 21 очко тўплаган ҳолда пешқадам «Пахтакор»дан атига 1 очко ортда қолиб, 2-ўринга мустаҳкам жойлашган.
Бу галги рақиб Ўзбекистоннинг қаторасига 3 маротаба чемпиони ҳисобланган Тошкентнинг "Локомотив" жамоаси. Айни пайтда Андрей Фёдоров қўл остида шуғулланаётган "темирйўлчилар" ўтказилган 9 турда 4 ғалаба ва 5 мағлубият қайд этиб, 12 очко билан жадвалда 8-ўринда бормоқда.
Бўлажак тўқнашув жамоаларнинг барча мусобақадаги умумий ҳисобда 24-беллашувига айланади. Ўзаро ўйинларда устунлик рақиб "Локомотив" тарафида. Ўтказилган 23 ўйинда "темирйўлчилар" 15 ғалаба қайд этишган. Шунингдек, АГМК 4 маротаба "Локомотив" устидан ғалабани тантана қилишга эришган. Қолган яна 4 учрашувда эса ғолиб номи аниқланмаган. Тўплар нисбати: 26-49.
Бўлажак баҳсга Миржалол Қосимов бошчилигидаги мураббийлар штаби АГМКни жиддий тайёрлашмоқда. Жамоа учинчи бор танаффусдан кейин чемпионатни тикламоқда. Дастлаб старт ва қаторасига икки рестарт. Шу боис мураббийлар штаби қисқа фурсатда футболчиларни аввало жисмоний ҳолатини тиклаш ва техник-тактик тарафлама пухта тайёрлашга жиддий эътибор қаратишди.
Ёзги трансфер ойнаси очилгач ҳар иккала жамоа сафида баъзи ўзгаришлар руй берди. Хусусан ўтган йил АГМКга келган Эркин Байдуллаев «Қизилқум»га трансфер қилинди. «Локомотив»нинг ҳам икки аъзолари Игнатий Нестеров ва Ойбек Қиличев чемпионат аутсайдери «Қизилқум»га ўтиб кетди. «Локомотив» ўнг қанот ҳимоячиси Даврон Ҳошимов эса «Навбаҳор»га кетди.
Хабарингиз бор, биринчи давранинг охирги тур ўйинларигача чемпионат Тошкент шаҳри ва вилоятида марказлаштирилган форматда ўтказилади. Шу боис АГМК нейтрал мезбон сифатида «Локомотив»га қарши баҳсни 17 август куни соат 19:00да «Бунёдкор» стадионида ўтказади.
