AGMK Superligadagi mag‘lubiyatsiz seriyasini davom ettirayotgan yagona jamoa bo‘lib turibdi.
O‘tkazilgan 9 turda AGMK 6 g‘alaba va 3 durangdan keyin 21 ochko to‘plagan holda peshqadam «Paxtakor»dan atiga 1 ochko ortda qolib, 2-o‘ringa mustahkam joylashgan.
Bu galgi raqib O‘zbekistonning qatorasiga 3 marotaba chempioni hisoblangan Toshkentning "Lokomotiv" jamoasi. Ayni paytda Andrey Fyodorov qo‘l ostida shug‘ullanayotgan "temiryo‘lchilar" o‘tkazilgan 9 turda 4 g‘alaba va 5 mag‘lubiyat qayd etib, 12 ochko bilan jadvalda 8-o‘rinda bormoqda.
Bo‘lajak to‘qnashuv jamoalarning barcha musobaqadagi umumiy hisobda 24-bellashuviga aylanadi. O‘zaro o‘yinlarda ustunlik raqib "Lokomotiv" tarafida. O‘tkazilgan 23 o‘yinda "temiryo‘lchilar" 15 g‘alaba qayd etishgan. Shuningdek, AGMK 4 marotaba "Lokomotiv" ustidan g‘alabani tantana qilishga erishgan. Qolgan yana 4 uchrashuvda esa g‘olib nomi aniqlanmagan. To‘plar nisbati: 26-49.
Bo‘lajak bahsga Mirjalol Qosimov boshchiligidagi murabbiylar shtabi AGMKni jiddiy tayyorlashmoqda. Jamoa uchinchi bor tanaffusdan keyin chempionatni tiklamoqda. Dastlab start va qatorasiga ikki restart. Shu bois murabbiylar shtabi qisqa fursatda futbolchilarni avvalo jismoniy holatini tiklash va texnik-taktik taraflama puxta tayyorlashga jiddiy e’tibor qaratishdi.
Yozgi transfer oynasi ochilgach har ikkala jamoa safida ba’zi o‘zgarishlar ruy berdi. Xususan o‘tgan yil AGMKga kelgan Erkin Baydullayev «Qizilqum»ga transfer qilindi. «Lokomotiv»ning ham ikki a’zolari Ignatiy Nesterov va Oybek Qilichev chempionat autsayderi «Qizilqum»ga o‘tib ketdi. «Lokomotiv» o‘ng qanot himoyachisi Davron Hoshimov esa «Navbahor»ga ketdi.
Xabaringiz bor, birinchi davraning oxirgi tur o‘yinlarigacha chempionat Toshkent shahri va viloyatida markazlashtirilgan formatda o‘tkaziladi. Shu bois AGMK neytral mezbon sifatida «Lokomotiv»ga qarshi bahsni 17 avgust kuni soat 19:00da «Bunyodkor» stadionida o‘tkazadi.
