"Интер" ҳужумчиси Ромелу Лукаку Европа лигаси финалида "Севилья" дарвозасига гол уриб, ўзига тегишли рекордни яна янгилади.

Бельгиялик форвард Европа лигасининг кетма-кет 11та учрашувида гол уришга муваффақ бўлди. Лукаку "Интер" сафида Европа лигаси доирасида 6та ўйинда 7та гол урди. Аввалроқ футболчи турнирнинг 1/16 финал босқичида бўлиб ўтган «Лудогорец»га қарши ҳар иккала ўйинда (2:1, 2:0), кейин эса «Хетафе»га қарши нимчорак финал баҳсида (2:0), чорак финалда «Байер»га қарши учрашувда (2:1) ҳамда "Шахтёр"га қарши ярим финал баҳсида (5:0) ҳам гол урган эди.

"Интер" жорий мавсумни Чемпионлар лигасида бошлаб, гуруҳда 3-ўринни эгаллагани учун ўз иштирокини Европа лигасида давом эттирди.

Лукаку сўнгги марта 2014/2015 йилги мавсумда «Эвертон» сафида Европа лигасида иштирок этганида, гуруҳ босқичининг 5-туридан бошлаб, чорак финал босқичи учрашувларига қадар кетма-кет 5та ўйинда 8та гол урган эди.

27 ёшли Лукаку жорий мавсумда "Интер" сафида барча мусобақалар доирасида 51та ўйинда майдонга тушиб, 34та гол урди ва 5та голга узатма берди. Унинг "нерадзурри" билан шартномаси 2024 йилга қадар тузилган.

Европа лигасидаги голли ўйинлар серияси бўйича иккинчи натижа Алан Ширерга тегишли бўлиб, у кетма-кет 8та учрашувда гол урган эди.