Англиянинг "Манчестер Юнайтед" клуби афсонавий футболчиси Рой Кин жамоа бош мураббийи Оле-Гуннар Сульшер ҳақида фикр билдирди.
"Жорий мавсумда энди Оледан соврин талаб қилишади. Ўтган йили АПЛнинг кучли тўртлигидан жой олиши шарт эди. Албатта, МЮ учта кубокнинг ярим финалида ўйнади, бироқ, бу йил талаб катта бўлади.
"Манчестер Юнайтед"дан "Ливерпуль" ва "Манчестер Сити"ларга яқин юриши талаб қилинади. Очколар фарқи сўнгги 3-4 йилдагидек катта бўлмаслиги керак.
Оле бу йил албатта қандайдир совринни ютиши шарт. Ўйлайманки, унинг "МЮ"даги "асал ойи" якунланди ва энди унга нисбатан босим кучаяди. Айниқса, жамоанинг сўнгги ҳафталарда кўрсатган ўйинлари орқали.
Ўйлашимча, агар жамоа мавсумни кучли тўртликда якунлай олмаса, у ҳолда Сульшер эгаллаб турган лавозимидан ҳайдалади", - Киннинг сўзларидан иқтибос келтирмоқда Sky Sports.
