ОФК тартиб-интизом қўмитаси Осиё Чемпионлар лигаси 1/8 финал ўйинлари якунларига кўра бир қатор қарорларни қабул қилди.

Жумладан, «Истиқлол»га қарши учрашувда ҳакам шаънига номақбул ҳатти-ҳаракат қилган «Пахтакор» жамоаси сардори Егор Кримец 5 минг АҚШ доллари миқдорида жаримага тортилди. Ушбу маблағдан 1250 доллари уч ой ичида, қолган 3750 доллари эса 2 йиллик шартли муддат ичида тўланиши мумкин. Яъни, Кримец ушбу қоидабузарлигини такрорласа, ушбу маблағ янги жарима қийматига қўшилади. 

Эътиборлиси, тартиб-интизом қўмитаси «Пахтакор»нинг бугунги рақиби «Персеполис» футболчиси Сиёмак Нематининг «Ас-Садд» билан ўйинда олган қизил карточкасини бекор қилди. Эронлик футболчи энди «Пахтакор»га қарши ўйинда майдонга тушиш имкониятига эга бўлади.