OFK tartib-intizom qo‘mitasi Osiyo Chempionlar ligasi 1/8 final o‘yinlari yakunlariga ko‘ra bir qator qarorlarni qabul qildi.
Jumladan, «Istiqlol»ga qarshi uchrashuvda hakam sha’niga nomaqbul hatti-harakat qilgan «Paxtakor» jamoasi sardori Yegor Krimes 5 ming AQSH dollari miqdorida jarimaga tortildi. Ushbu mablag‘dan 1250 dollari uch oy ichida, qolgan 3750 dollari esa 2 yillik shartli muddat ichida to‘lanishi mumkin. Ya’ni, Krimes ushbu qoidabuzarligini takrorlasa, ushbu mablag‘ yangi jarima qiymatiga qo‘shiladi.
E’tiborlisi, tartib-intizom qo‘mitasi «Paxtakor»ning bugungi raqibi «Persepolis» futbolchisi Siyomak Nematining «As-Sadd» bilan o‘yinda olgan qizil kartochkasini bekor qildi. Eronlik futbolchi endi «Paxtakor»ga qarshi o‘yinda maydonga tushish imkoniyatiga ega bo‘ladi.
