Ла Лига президенти Хавьер Тебас «Барселона» ҳужумчиси Лионель Месси Испания чемпионатида қолганидан хурсандлигини маълум қилди.

«Мессининг Испания чемпионатида ўйнаётганини кўриш менга ёқади. У пул ушлашга мўлжалланган машина. Биз бир неча йил давомида Месси ва Роналдунинг кетишига тайёргарлик кўрдик. Неймар «ПСЖ»га ўтиб кетди, аммо Франция лигаси бундан ўсишга эришмади. Роналду «Ювентус»га йўл олди, аммо А серия ҳам молиявий жиҳатдан ютмади.

Агар Месси кетганида биз Ла лига трансляцияси ҳуқуқини бутун жаҳон бўйлаб сотишда давом этардик. Ҳеч ким бизга қўнғироқ қилиб, "Агар Месси кетса, шартномани бекор қиламиз", — демади.

Лигалар учун футболчилар муҳим, аммо футбол давом этади. Роналду ва Неймар Испаниядан кетишди, аммо биз ўсишда давом этяпмиз. Ла лига брендини ошириш учун қилаётган ишларимиз ўз самарасини беряпти. Фақатгина бир футболчи бутун лигани ўзгартириб юбора олмайди», — деди Тебас "La Gazzetta dello Sport" нашрига берган интервьюсида.