Ўзбекистон терма жамоасининг ФИФА кунлари назорат учрашувларида қатнашганлиги боис Coca Cola Суперлигада танаффус юзага келганди. Суперлига жамоалари ҳам бу бўшлиқни кўрик ўйинлари билан тўлдиряпти. Бекободнинг “Металлург” жамоаси иккинчи назорат учрашувини Тошкентнинг “Локомотив” жамоасига қарши ўтказди. ТТЗ даҳасида жойлашган “Локомотив” стадионида кечган бу ўйинда ҳисоб очилмади, дарвозалар даҳлсизлиги сақлаб қолинди – 0:0.
Андрей Шипилов мазкур учрашувда терма жамоалар йиғинига жалб этилган Шаҳзодбек Убайдуллаев, Маҳмуд Қудратиллаев хизматидан фойдалана олмади. Қолган барча ўйинчилар майдонга тушириб, синовдан ўтказилди.
Бугундан “Металлург” футболчилари Бекободда тўпланади ва 19 октябрь куни Наманганда “Навбаҳор” билан бўлиб ўтадиган 19-тур учрашувига тайёргарликни давом эттиради.