Coca Cola Суперлига 20-турида Бекободнинг “Металлург” жамоаси ўз уйида “Бухоро” жамоасини қабул қилади.

Ушбу жамоалар шу кунга қадар кучлилар сафида 45 марта тўқнаш келишган. Ортда қолган учрашувларнинг 21 тасида “Металлург” ғалаба қозонган бўлса, 18 та ўйинда бухороликларнинг қўли баланд келган. 6 та ўйинда эса дуранг натижа қайд этилган. Киритилган ва ўтказиб юборилган тўплар фарқи бекободликлар фойдасига – 63:59. “Металлург”нинг “Бухоро” устидан қозонган энг йирик ғалабаси учта тўп фарқидан иборат – 3:0, 4:1. Бекободликлар бир марта ўз майдонида, икки марта сафарда шундай ҳисобларда муваффақиятга эришган. “Бухоро”нинг “Металлург” устидан эришган энг йирик ғалабаси эса 4:0 ни ташкил этади.

Мазкур жамоаларнинг Бекободда ўтказилган ўйинларида “Металлург” тўлиқ устунликка эга бўлиб келмоқда. Мезбонлар 22 та учрашувнинг 18 тасида зафар қучишган, фақат биринчи ўйинда кучлар тенг келган, 3 бор эса меҳмонлар ғалаба нашидасини суришган.

Мазкур жамоаларнинг бу йилги мавсум биринчи давра учрашуви Муборак шаҳридаги Баҳром Вафоев номли стадионда бўлиб ўтди ва унда “Металлург” 4:1 ҳисобида зафар қучди. Аббос Отахонов, Станислав Андреев ҳамда Шаҳзодбек Убайдуллаевнинг дублига бухороликлар Суҳроб Неъматовнинг битта аниқ зарбаси билан жавоб қайтарганди.

Бекободда ўтган сўнгги бешта учрашув натижаси:

29.03.2019 «Металлург» - «Бухоро» 2:0
30.10.2018 «Металлург» - «Бухоро» 1:0
29.04.2018 «Металлург» - «Бухоро» 2:1
29.04.2017 «Металлург» - «Бухоро» 1:2
24.09.2016 «Металлург» - «Бухоро» 1:2