Про лиганинг 13-турида сафарда аутсайдер "Зомин" клуби  билан баҳс юритган  "Нефтчи", ишончли ғалабани қўлга киритиб, турнир жадвалида биринчи поғонага кўтарилиб олди.

Бугунги беллашувда биринчи хавфли вазият 6-дақиқада рўй берди. Мезбонларнинг хужумчиси Жонибек Кўчимов дарвозамиз томон йўллаган зарбаси кучсиз чиқди. 11-дақиқада эса навбат меҳмонларга ўтди ва чап қанотдан уюштирилган ҳужум гол билан якунланди. Достонбек Тошматов ошириб берилган тўпни дарвозага аниқ йўллади — 0:1.

Голдан руҳланган фарғоналиклар 23-дақиқада ҳисобни янада оширишди. Бу гал чап қанотдан ёриб кирган ярим ҳимоячи Рустамжон Абдуҳамидов узоқдан кучли зарба бериб, мезбонлар дарвозабонини ожиз қолдирди — 0:2.

Вазиятни ўзгартириш мақсадида зоминликлар томонидан уюштирилган ҳужумларнинг бирида тўп жарима майдони ичида "Нефтчи" футболчисининг қўлига тегди ва бош ҳакам пенальти белгилади. Дилшод Хушбаков пенальтини аниқ бажариб, ҳисобдаги фарқни қисқартирди — 1:2. Бу натижа биринчи бўлим охиригача ўзгармади.

Иккинчи бўлимда катта куч билан олдинга ташланган "Зомин" 62-дақиқага келиб мувозанатни тикладилар. Бу сафар мезбонлардан Отабек Аҳмаджонов голга муаллифлик қилди.

Лекин ғалаба илинжида майдонга тушган "Нефтчи" 74-дақиқада ҳисобда олдинга олиб чиқди. Жамоа тўпурари Достонбек Тошматов гол уриб, ўйиндаги дублга эришди — 2:3.

Ўйин тақдирини ҳал қилган гол эса 83-дақиқада киритилди. Бу сафар Достонбек Тошматов, Рустамжон Абдуҳамидов ва Мансур Саидовлар  учлиги чиройли комбинация уюштиришиб, тўртинчи голни дарвозага жойлаб қўйишди — 2:4.

Шундай қилиб, эртага давом эттириладиган 13-тур ўйинлари олдидан "Нефтчи" 27 очко тўплаб биринчи поғонага кўтарилиб олди.

Про лига 13-тур
“Зомин” - “Нефтчи” - 2:4 (1:2)
Голлар: Достонбек Тошматов, 11 (0-1), Рустамжон Абдухамидов, 23 (0-2), Дилшод Хушбақов пен., 28 (1-2), Отабек Ахмаджонов 62' (2-2), Достонбек Тошматов (2-3) 74', Мансур Саидов (2-4) 83'

"Нефтчи" матбуот хизмати.