Ўзбекистон миллий жамоаси йиғинида иштирок этаётган Жанубий Кореянинг «Гвангжу» клуби футболчиси Рустам Ашурматов ЎФА Матбуот хизматига интервью берди.

"Жисмоний ҳолатимни зўр деб айта олмайман. Чунки терма жамоанинг октябрь ойидаги йиғинидан кейин Тошкентда қолдим. "Бунёдкор" клуби сафида машғулотларда иштирок этдим. Ўртоқлик ўйинларигача формамни янада яхшилашга ҳаракат қиламан.

Ўз клубим ҳақида тўхаталадиган бўлсам, «Гвангжу»нинг натижасидан қониқдик. Мавсумни 6-ўринда якунладик. Корея чемпионатининг кейинги мавсумига яхши тайёргарлик кўрамиз.

Одатда араб мамлакатлари жамоалари билан ўйнаш қийин, аммо Ўзбекистон ҳар қандай жамоа билан ўйнай олади. Футболчилар ҳам бунга ишонишади. Шунинг учун фақат ўз ўйинимизни намойиш этсак, муаммо бўлмайди, деб ўйлайман.

Ҳозирда Корея чемпионати якунлангани учун мазкур йиғиндан кейин ҳам Тошкентда қолиб, маълум вақтдан кейин янги мавсумга тайёргарлик кўриш учун Кореяга жўнаб кетаман", — деди Рустам Ашурматов.