O‘zbekiston milliy jamoasi yig‘inida ishtirok etayotgan Janubiy Koreyaning «Gvangju» klubi futbolchisi Rustam Ashurmatov O‘FA Matbuot xizmatiga intervyu berdi.

"Jismoniy holatimni zo‘r deb ayta olmayman. Chunki terma jamoaning oktyabr oyidagi yig‘inidan keyin Toshkentda qoldim. "Bunyodkor" klubi safida mashg‘ulotlarda ishtirok etdim. O‘rtoqlik o‘yinlarigacha formamni yanada yaxshilashga harakat qilaman.

O‘z klubim haqida to‘xataladigan bo‘lsam, «Gvangju»ning natijasidan qoniqdik. Mavsumni 6-o‘rinda yakunladik. Koreya chempionatining keyingi mavsumiga yaxshi tayyorgarlik ko‘ramiz.

Odatda arab mamlakatlari jamoalari bilan o‘ynash qiyin, ammo O‘zbekiston har qanday jamoa bilan o‘ynay oladi. Futbolchilar ham bunga ishonishadi. Shuning uchun faqat o‘z o‘yinimizni namoyish etsak, muammo bo‘lmaydi, deb o‘ylayman.

Hozirda Koreya chempionati yakunlangani uchun mazkur yig‘indan keyin ham Toshkentda qolib, ma’lum vaqtdan keyin yangi mavsumga tayyorgarlik ko‘rish uchun Koreyaga jo‘nab ketaman", — dedi Rustam Ashurmatov.