«Ливерпуль» бир йўла икки нафар марказий ҳимоячисини узоқ муддатга йўқотгач, трансфер режаларини тузиб чиқишга мажбур бўлди.

The Athletic хабарига кўра, мерсисайдликларнинг яқин вақт ичидаги асосий мақсади «Лейпциг» ҳимоячиси Даё Упамекано бўлиб турибди. «Қизиллар» 22 ёшли франциялик футболчини 2021 йилнинг ёзида харид қилишни мақсад қилганди. Ўша вақтга бориб унинг шартномасида 40 миллион фунт товон пули борасидаги банд фаоллашади.

«Ливерпуль» шорт-листида яна уч нафар ҳимоячи бор. Рўйхатдан «Брайтон»нинг 23 ёшли футболчиси Бен Уайт ўрин олган, бироқ «Ливерпуль» ҳимоячини чет эл клубидан сотиб олиш арзонга тушади деб ҳисобламоқда. Шу мақсадда Премьер Лига амалдаги чемпиони «Шальке-04»нинг 20 ёшли туркиялик ўйинчиси Озан Кабак ёки «Торино»нинг 23 ёшли бразилиялик ҳимоячиси Бремерни олиб келмоқчи.

Эслатиб ўтамиз, «Ливерпуль»нинг икки асосий марказий ҳимоячилари Виржил ван Дейк ва Жо Гомес жиддий жароҳатлар туфайли узоқ муддатга сафдан чиқди. Шунингдек, ушбу позицияни ёпиши мумкин бўлган ярим ҳимоячи Фабиньода ҳам жароҳат бор.