Италиянинг «Интер» ва Хорватия терма жамоаси футболчиси Марцело Брозович коронавирусга чалинганлиги ҳақида мамлакат футбол федерацияси расмий сайти хабар бермоқда.

Хорватиялик футболчилар Туркия терма жамоасига (3:3) қарши ўтказилган ўртоқлик учрашувидан кейин коронавирус учун тест топширишди. Биринчи бўлимдан сўнг ҳимоячи Домагой Вида алмаштирилган эди, чунки ўйин куни унинг тест натижаси «потенциал ижобий» чиққани ўйин мобайнида маълум бўлганди.

Тест натижаларига кўра, Брозович ва терма жамоанинг яна бир ходимида коронавирус аниқланган. Касалликни юқтириб олган Брозович ва терма жамоа ходими карантинга олинган. УЕФА протоколига кўра жамоанинг бошқа аъзолари ўйнашда давом этаверади.

Хорватия терма жамоаси навбатдаги учрашувини Миллатлар Лигаси доирасида 14 ноябрь куни Швеция терма жамоасига қарши ўтказади.