Каталониянинг «Барселона» жамоаси собиқ ярим ҳимоячиси Деко Леонель Мессининг бошқа жамоага ўтиш борасида ўз фикрлари билан ўртоқлашди. Португалиялик афсона Леонинг қачонлардир жамоадан кетиши аниқ эканлиги ҳақида фикр билдириб ўтди.
“Биласизми, футболчи ўзини бор имкониятларини намойиш этиш учун ўша клубда бахтли бўлиши лозим. Жамоада ўзини эркин ҳис этмаган футболчи майдонда ҳам 100 фоиз натижа кўрсатишга қодир эмас. Бу аниқ. Футболчилик фаолиятимдан келиб чиқиб шуни маълум қилишим мумкинки, айни дамда Лео катта босим остида қолиб кетган. Шу боис, унинг майдондаги ҳаракатлари аввалги даражада эмас. Бунинг учун футболчини айблаш ноўрин. У тўлиқ имконият билан ҳаракат қилмаяпти.
Менн қачонлардир Мессининг «Барселона»ни тарк этишини билар эдим. Aфсуски, бу содир бўлиши мумкин. Бошланган нарсанинг албатта якуни бор. Бошқача бўлиши мумкин эмас. Ҳар қандай юлдуз ҳам ўзини эркин ва бахтли ҳис этмаган жойни тарк этишни истайди. Бу нормал ҳолат. Буюк футболчилар кетишади. Бу воқеа Мессига қадар содир бўлиб келган. Ундан кейин ҳам давом этади.
Тўғри, «Барселона» учун жуда кўп нарсани англатувчи инсоннинг кетиши ҳақида фикр билдириш осон. Буни кўпчилик ғалати тушуниши мумкин, аммо ҳеч ким спортда абадий қолмайди. Aйниқса, футболда бу ишни узоқ амалга оширишнинг имкони йўқ. Лео қўлга киритиш мумкин бўлган барча совринларга эга чиқиб бўлди. Энди уни бошқачасига аташ мумкин эмас! У клуб сафида тўп сурган барча замонлардаги энг яхши футболчи!
Очиғи, аргентиналик даҳони бошқа жамоа либосида тасаввур қилиш мушкул, аммо қачонлардир бу воқеа содир бўлади. Бунга ишончим комил. Ҳаммаси бу неча йилдан кейин содир бўлишига боғлиқ.
Месси «Барселона»да улғайди ва айнан шу жамоа сафида шахс сифатида тарбия топди. Кетиш ҳақидаги қарорни қабул қилиш унинг ўзига ҳам осон эмас. Каталония унинг ватанига айланиб бўлди. Фарзандлари шу ерда туғилди. Оиласи айнан шу шаҳарда ташкил топди. У бошқа исталган клубга ўтмасин, «Барселона»ни соғиниши аниқ. Бу жамоа унинг учун ҳамма нарса эди! Бундай ҳислар оғушида жамоасини ташлаб кетиш оғир бўлиши аниқ. Шундай бўлсада, бир ёки икки йилдан сўнг у кетади. Балки, 4 йилдан сўнг кетар. Балки мавсум сўнггида унинг клуб сафидаги сўнгги учрашувини томоша қилармиз. Буниси бизга қоронғи. Шуниси аниқки, Лео ҳар қандай вазиятда ҳам клуб мухлислари учун биринчи рақамли бўлиб қолаверади! Орадан 50 йил ўтгандан кейин ҳам унинг майдонда кўрсатган қаҳрамонликлари ҳаяжон билан ёдга олинади. У афсона! Месси қайси клубга ўтмасин, бу мақомни ундан ҳеч ким тортиб олишга қодир эмас."
