Украина терма жамоасининг Швейцария терма жамоасига қарши бўлиб ўтмаган ўйинига 0:3 ҳисобида техник мағлубият ёзилди. Бу ҳақда Украина футбол ассоциацияси УЕФА томонидан юборилган қарорга асосланиб хабар бермоқда.
Эслатиб ўтамиз, Миллатлар Лигаси доирасидаги Швейцария – Украина терма жамоалари ўртасидаги учрашув Андрей Шевченко бошчилигидаги терма жамоа таркибида коронавирусга чалинганлар сони кўпайиб кетганлиги учун ўтказилмаганди. Швейцарияликлар бу учун Украинадагилар жавобгар эканлигини таъкидлаганди. Якунда эса УЕФА швейцарияликлар фойдасига қарор чиқарди.
УЕФА қарори билан Украина терма жамоаси ўз гуруҳининг сўнгги ўринига тушиб қолди. Энди украиналиклар турнирнинг кейинги босқичини "Б" дивизионда бошлашади.
