«Реал» бош мураббийи Зайниддин Зидан Ла лиганинг 11-туридан ўрин олган «Алавес»га қарши ўйин (1:2) борасида ўз фикрини билдириб ўтди.

Ушбу мавсумда ғалабалар сони камлиги ҳақида
«Бунга изоҳ бера олмайман. Бугун баҳс давомида гоҳ яхши ўйнадик, гоҳ — ёмон. Рақиб учинчи дақиқадаёқ гол урса, вазият қийинлашиб кетади. Бизнинг ҳозирги ҳолатимиз шундай.

Ишлашда давом этишимиз, ўйинчиларга тикланиши учун ёрдам беришимиз керак. Бизга барқарорлик етишмаяпти.

Бугун учрашувнинг старти «Реал» учун ушбу мавсумдаги энг ёмон бўлди. Биз ўйин динамикасини ўзгартира олмадик. Бу эса мени хавотирга солмоқда. Бизда барқарорлик, жароҳатлар билан боғлиқ муаммо мавжуд. Бу баҳона эмас, бу реал ҳолат».

Азарнинг жароҳати ҳақида
«Ўйлайманки, у шунчаки зарба қабул қилди. Умид қиламан, унинг мушаги жароҳат олмади», – деди Зидан.