Профессионал боксда фаолият олиб бораётган ўзбекистонлик икки спортчи Тошкент вақти билан 13 декабрь тонгида рингга кўтарилишади.

Енгил вазн (61,2 кг) тоифасида ҳаракат қилиб келаётган Элнур Абдураимов (5-0, 5 КО) ўзининг 6-жангини ўтказади. Мексикада ўтказиладиган жангда Элнурга 22 ёшли Абраҳам Олива (4-0, 3 КО) рақиблик қилади.

Мексикалик Олива ҳозирга қадар профессионал боксда 4 та жанг ўтказиб, уларнинг барчасида ғалаба қозонган. 3 та жангда рақибларини нокаутга учратган.

Элнур эса ҳозирга қадар профессионал рингда 5 та жанг ўтказиб, уларнинг барчасида рақибларини нокаут орқали таслим қилган.

Профессионал бокснинг оғир вазн тоифасида ҳаракат қилиб келаётган Баҳодир Жалолов (6-0, 6 КО) эса ўзининг 7-жангини ўтказади. Мексикада ташкил этиладиган бокс кечасида Баҳодирга мезбон спортчи Уилфредо Лил (10-17-3, 8 КО) рақиблик қилади.

Қайд этиш жоиз, Уилфредо Лил ҳозирга қадар профессионал боксда 30 та жанг ўтказиб, уларнинг 10 тасида ғалаба қозонган (8 та жанг рақибларини нокаутга учратган). 17 та жангда мағлуб бўлган (13 та жангда нокаутга учраган). 3 та жанги эса дуранг билан тугаган.

Эслатиб ўтамиз, Баҳодир Жалолов профессионал боксдаги сўнгги жангини 2019 йил 10 апрелида Брендан Барреттга қарши ўтказиб, рақибини 1-раунддаёқ нокаутга учратганди.