Professional boksda faoliyat olib borayotgan o‘zbekistonlik ikki sportchi Toshkent vaqti bilan 13 dekabr tongida ringga ko‘tarilishadi.

Yengil vazn (61,2 kg) toifasida harakat qilib kelayotgan Elnur Abduraimov (5-0, 5 KO) o‘zining 6-jangini o‘tkazadi. Meksikada o‘tkaziladigan jangda Elnurga 22 yoshli Abraham Oliva (4-0, 3 KO) raqiblik qiladi.

Meksikalik Oliva hozirga qadar professional boksda 4 ta jang o‘tkazib, ularning barchasida g‘alaba qozongan. 3 ta jangda raqiblarini nokautga uchratgan.

Elnur esa hozirga qadar professional ringda 5 ta jang o‘tkazib, ularning barchasida raqiblarini nokaut orqali taslim qilgan.

Professional boksning og‘ir vazn toifasida harakat qilib kelayotgan Bahodir Jalolov (6-0, 6 KO) esa o‘zining 7-jangini o‘tkazadi. Meksikada tashkil etiladigan boks kechasida Bahodirga mezbon sportchi Uilfredo Lil (10-17-3, 8 KO) raqiblik qiladi.

Qayd etish joiz, Uilfredo Lil hozirga qadar professional boksda 30 ta jang o‘tkazib, ularning 10 tasida g‘alaba qozongan (8 ta jang raqiblarini nokautga uchratgan). 17 ta jangda mag‘lub bo‘lgan (13 ta jangda nokautga uchragan). 3 ta jangi esa durang bilan tugagan.

Eslatib o‘tamiz, Bahodir Jalolov professional boksdagi so‘nggi jangini 2019 yil 10 aprelida Brendan Barrettga qarshi o‘tkazib, raqibini 1-raunddayoq nokautga uchratgandi.