Яқин кунлар ичида «МЮ» аъзоси Пол Погба ва раҳбарият ўртасида ўзаро зиддиятли можаролар келиб чиқаётганидан хабарингиз бор. Маълумотларга қараганда клуб франциялик юлдуз учун катта суммадаги маош беришдан манфаатдор эмас. Бунинг устига улар Поогбанинг яқин ойлар ичидаги кўрсатаётган ўйинларидан қониқиш ҳосил қилишмаяпти. У «қизил иблислар»нинг ўзи қатнашган сўнгги 35 та учрашувида атиги 3 та гол уриб 6 та голга ассист берган холос. Бунинг устига Opta нинг хабар беришича, у битта мураббий қўл остида энг кўп пенальтиларга ҳам сабабчи бўлиб қолган.
Бошқа статистиc кўрсаткичлар бўйича ҳам францияликниннг Манчестерда омади юришмаяпти. Табиийки, 105 миллионга сотиб олинган футболчи ишончни оқламаётгандан сўнг раҳбарият айни молиявий инқироз пайтида уни яхшигина пуллаб юборишдан манфаатдор. Буни Полнинг ўзи ҳам қайсидир маънода хоҳламоқда. У ўз истеъдодини яхшироқ оча оладиган бошқа бир гранд клубга кетмоқчилигини агенти орқали ҳам бир неча марта таъкидлаб ўтди. Булардан хулоса қилиш мумкинки, Погба катта эҳтимол билан қишжи трансферлар ойнасида клубини тарк этишга яқин.
Биз эса «МЮ»нинг франциялик футболчи ўрнини тўлдириши кутилаётган эҳтимолий 5 трансферга эътиборингизни қаратамиз.
Раян Гравенберх («Аякс»)
Раян Погба билан солиштирилганда доим келажаги порлоқ футболчи сифатида тилга олинган. У «Аякс»нинг умидли ёшларидан бири. Майдонда эркин ижрочи ва исталган позицияда бирдек ўйнай олади. Ҳар қалай у буни яқин учрашувлар давомида бир неча бор исботлашга улгурди. У жорий мавсум Эредивизияда 10 та баҳсда майдонга тушиб, 1 та гол ва 4 ассистни ўз ҳисобига ёздириб қўйди. Ўтган мавсум биз нидерландиялик футболчини кўпинча таянч зонасидаги ҳаракатлари орқали эслаб қолганмиз. У ҳимоявийга тортиб кетадиган кучли яримҳимоячилардан бири ҳисобланади. Шунинг учун ҳам у голлардан кўра кўпроқ узатмаларда, хавфли вазиятлар яратишда иштирок этади, XG си ҳам ёмон эмас.
У «Аякс»да дебют қилган пайти бор йўғи 16 ёш, 130 кунлик эди. Ушбу натижаси орқали у Кларан Зейдорфнинг рекордини янгилаганини ҳам алоҳида таъкидлаб ўтиш жоиз. Шунингдек, Раян характер нуқтайи назаридан жуда оғир, босиқ бўлиб, унинг майдонда ўзини тутиши ёшига нисбатан кўпчиликни ҳайратга солади, ҳакам билан бўладиган баҳсли вазиятларда деярли иштирок этмайди. Унинг айни пайтдаги потенциалини собиқ нидерландиялик футболчи Роналд де Бур ҳам юқори баҳолади. Дарҳақиқат, Гравенберх «Де Тоекомст»нинг ёш ва умидли вакили сифатида Погба ўйнаётган ампулага тўла мос келади.
Эдуардо Камавинга («Ренн»)
Камавинга Франция фуқаролигини қабул қилган, асли келиб чиқиши эса Анголадан. Франциялик ёш иқтидор эгаси бугунги кунда жуда кўплаб клубларнинг қизиқиш доирасига тушган. Унга «қизил иблислар»дан ташқари Мадриднинг «Реал» клуби ҳам бир неч маратоба оғиз солиб кўрди. Зеро, Эдуардо ўз навбатида бунга лойиқ босқичларни ҳам босиб ўтмоқда. У ўтган мавсум жамоасининг узоқ кутилган ЕЧЛ йўлланмасини қўлга киритишида улкан ишларни амалга оширди. Кмавинганинг вазифаси бироз бўлсада Гравенберхникига ўхҳаб кетади, кўпинча жамоанинг «қора» ишларига масъул. Шунинг учун голларда бевосита иштирок этмаса ҳам унинг вужудга келишида франциялик ҳақиқий жонбозлик кўрсатади. Қаҳрамонимиз ўтган йили 25 та учрашувда майдонга тушиб, 1+2 натижани қайд этган бўлса, жорий мавсум у 12 та ўйинда 1 та гол уриб яна шунча голга ассист берган. Бунинг устига ўтган йили бир марта ойнинг энг яхши ўйинчиси сифатида тан олинган.
Клубидаги ёрқин ўйинлари эвазига у миллий терма жамоа йиғинига ҳам чақирилди. Илк учрашувларини ёрқин ўтказиши мобайнида гол ҳам уришга муваффақ бўлди. Ушбу голи орқали Эдуардо «учранглилар» тарихида гол урган иккинчи энг ёш футболчига айланиб олди. «Ренн» бош мураббийи Хулиан Стефан унинг жамода қолишини чин дилдан истамоқда: “У ҳозир супер формада. Табиийки, у ўз даражасидаги клубда ўйнашни хоҳлайди. Лекин Камавинга «Ренн» учун камида бир йил ўйнаб бериши керак. Клуб унга улкан ишонч билдирмоқда, атрофдагиларини ҳурмати учун ҳам яна озроқ бу ерда қолиши керак”, - дейди мутахассис. Бироқ, шунга қарамай футболчининг ўзи Францияда ортиқ қолмоқчи эмас. У буни яқинда ўз агенти орқали айтиб ўтди. «МЮ» унинг транфери учун ҳозирча 45 миллион таклиф қилмоқда. Агар Погба масаласи январда узил-кесил ҳал бўлса, Камавинга катта эҳтимол Манчестерга кўчиб ўтади.
Жек Грилиш («Астон Вилла»)
Грилиш «МЮ»га даавогарлар орасида аввалдан бери мавжуд. «Манкунианлар»нинг Санчо борасидаги омадли келишуви амалга ошмаётгандан кейин, улар Жекни иккинчи планга олиб қўйишган. Дарҳақиқат футболчи юқори эътиборга лойиқ истеъдодини намойиш эта олади, энг керакли жиҳати унда юқори стабиллик бор. Грилиш ўтган мавсум клубининг энг фойдали ўйинчиларидан бири бўлган эди. 25 ёшли футболчи «Астон Вилла» сафида Премьер-лига доирасида жами 30 та учрашувда майдонга тушиб 8 та гол ва 6 та ассист қайд этган ва жамоасининг мусобақада аранг жон сақлаб қолишида унинг хизматлари беқиёс.
Лекин жорий мавсум Грилиш росмана Премьер-лиганинг энг яхшилари қаторида эътироф этилмоқда, статистика ҳам буни тасдиқлайди. У ўзи майдонга тушган 10 баҳснинг 5 тасида гол уришга эришди. Бунинг устига мусобақанинг энг яхши ассистентлари рўйхатида Ҳарри Кейн ва Кевин де Брюйнелардан кейин 3-натижани қайд этиб турибди – (6). Шунингдек, футболчи катта клублар билан ўйинларда доим ўзини кўрсатиб келади. Сўзимизнинг исботи сифатида фақатгина «Ливерпул»га қарши қарама-қаршиликни эслашнинг ўзи кифоя. У 7-2 ҳисобидаги тарихий ғалабада 2+3 натижани қайд этди. Бу эса «қизиллар» тарихидаги рақиблар ичида энг вахший қотил дегани. Жек 25 ёш бўлишига қарамай миллий терма сафига бу йил энди чақирув олди, лекин ҳозирча у икки ассистдан ташқари ҳали яхшироқ натижа кўрсатгани йўқ. Агар униг Премьер-лигадаги ёрқин натижалари давомий бўлиб чиқса, яқин орада уни «орзулар театри»да кўриб қолсак ҳам ажаб эмас.
Денис Закария («Боруссия М»)
Денис қисқа муддат ичида анчагина ўз мухлислари аудиториясини кенгайтириб олди. У ва унинг жамоаси «Боруссия» жорий мавсум ЕЧЛ кашфиётлари сирасида тилга олинмоқда. Клуб «ўлим гуруҳи» дея тилга олинган ерда «Интер»дек жамоани мусобақадан чиқариб юборган ҳолда келаси босқич масаласини ижобий ҳал этди. Энди бундан буёғига ҳам бир хил темпда давом этиш учун унда барча имкониятлар етарли.
2017 йилда Мюнхенгладбахга кўчиб ўтганидан буён клуби сафидаги муҳим фигуралардан бири ҳисобланади. Ўтган йилги мавсумда у 2 та гол уриб яна шунча голга ассист ҳам берган. Албатта бу ўйинлар миқдори билан солиштирилганда топ даражага интилаётган футболчи учун паст кўрсаткич бўлиши мумкин. Лекин 24 ёшли яримҳимоячи ўз даражасидан пастга қараб тушиб кетмаган. Унда шерикларини яхши тушуниш, прессингга ишлаш хусусиятлари кучли шаклланган. Узатётган пассларининг аниқлиги бўйича Бундеслигадаги энг яхши кўрсаткичлардан бири қайд этилган – 87%. «МЮ» раҳбарияти Закарияни Матич билан тандемда синаб кўришмоқчи.
Сергей Милинкович Савич («Лацио»)
Савич юқорида тилга олинган футболчилардан фарқли ўлароқ жамоасининг кўпйиллик тажрибали вакилларида бири ҳисобланади. Шунга яраша клубига келтирган фойдаси ҳам бирмунча салмоқлироқ. У «Лацио» сафида майдонга тушган 200дан зиёд баҳслари давомида 42 гол ва 30 ассистни қайд этган. Тўпни ўзида максимал олиб юриш ва айниқса, ҳаводаги курашларда серб футболчиси етук даражага чиқиб улгурди. Ўтган мавсумдаги сермаҳсулликлари эвазига Савич «римликлар»нинг муҳим қуролига айланганди, узатма бериш бўйича А Сериянинг энг кучлилари қаторида эътироф этиб келинади. Айниқса, жорий мавсум «Лацио»нинг 20 йил деганда илк бор ЕЧЛ плей-оффига чиқишида унинг хизматлари беқиёс. Манчестер клуби Савич трансфери борасида Рим клуби билан бундан икки йил олдин ҳам қисқа музокаралар олиб борган, бироқ унинг ўзи Англияга кўчиб ўтишни истамаган эди. Бўлажак битимнинг қандай тус олишини эса вақт кўрсатади.
Юсуфбек Сайдалиев тайёрлади
