«Бунёдкор» клубининг 19 ёшли ҳимоячиси Иброҳимхалил Йўлдошев фаолиятини Украина чемпионатида давом эттириши мумкин. Унга Украина премьер-лигасининг 4та клуби қизиқиш билдирмоқда.

Бу ҳақда футбол агенти Никита Швец Footboom'га берган интервьюсида маълум қилди. Аммо ўзбекистонлик футболчига қайси жамоалар қизиқиш билдираётгани ҳақида маълумот берилмади.

«Ҳа, бу рост. Мен Йўлдошевнинг Украинада агенти ҳисобланаман. Ҳозирда музокаралар кетмоқда ва унга УПЛ клублари томонидан қизиқиш мавжуд.

Иброҳимхалил фаолиятини Украинада давом эттириш эҳтимоли юқори. Айнан қайси жамоалар? Афсуски, ҳозирча буни айта олмайман. Жадвалда дастлабки 10та поғонани эгаллаб турган клублар билан музокара олиб борилаётганини тасдиқлашим мумкин», – деди Швец.

Иброҳимхалил Йўлдошев Суперлиганинг жорий мавсумида 22та ўйинда майдонга тушиб, битта гол урди ва битта голга узатма берди. У Ўзбекистон терма жамоаси сафида 4та учрашувда иштирок этди.