Туриннинг «Ювентус» клуби ҳужумчиси Криштиану Роналду 2020 йилнинг иккинчи ярмидаги ўйинлар бўш стадионларда ўтказилганидан норози бўлди.
- Тўғрисини айтганда, бўш стадионларда ўйнаш жуда зерикарли, - деди Роналду Globe Soccer Awards тақдирлаш маросимида. - Мен барча протоколларни ҳурмат қиламан, чунки инсон соғлиги биринчи ўринда, лекин бу барибир менга ёқмаяпти. Мен қоидаларга амал қиламан, сабаби, футболни яхши кўраман. Мен оилалар, болалар, мухлислар учун ўйнайман, лекин бундай стадионларда футбол ўйнаш осон эмас. Менга мухлисларнинг ҳайқириқлари ёқади, бу менга қўшимча мотивация беради. Умид қиламанки, 2021 йили қоидалар ўзгаради ва биз яна тўлиб-тошган стадионларни кўрамиз, чунки футбол мухлисларсиз - қизиқарли эмас", - деди Роналду.
