Испания чемпионатининг 18-туридан ўрин олган «Осасуна» ва «Реал» клублари ўртасидаги ўйин бугун ўтказилмаслиги мумкин. Бунга Памплона шаҳридаги ноқулай об-ҳаво шароити сабаб сифатида айтилмоқда.

"As" тарқатган хабарга кўра, ҳозирда «Осасуна» стадионининг 40 нафар ходими майдонни яхши ҳолатда сақлаб туриш учун ишламоқда. Аммо қор ёғиши кучаймоқда ва майдонни яхши ҳолатда сақлаш қийинлашиб бормоқда.

«Осасуна» клуби вазиятга оптимистик руҳ билан ёндашмоқда. Арена ходимлари қиздирувчи лампалар ёрдами қорнинг эриб кетишини таъминлашмоқда. Аммо олдиндан бирор нарса дейиш қийин.

Жамоалар ўртасидаги баҳс Тошкент вақти билан 01:00да бошланади. Ўйинни ўтказиш борасидаги қарор эса 22:00да қабул қилинади.

Агар ўйин бугун бекор қилинса, у эртага эрталиб ўтказилиши мумкин. Аммо баҳс ўз вақтида бўлиб ўтишига умид бор. "Реал" учрашувни бир соат эртароққа суришни сўради, аммо Ла лига бу таклифга рад жавобини берди.