"Сантос" ҳужумчиси Неймар "El Pais" газетаси томонидан ташкил этилган Жанубий Американинг энг яхши футболчиси анъанавий сўровномасида ғолиб чиқди.
Неймар сўровномада иккинчи бўлган "Наполи"нинг чилилик футболчиси Эдуардо Варгасдан 60 овозга ўзиб кетиб, яққол устунлик билан ғалаба қозонди. Сўровномада жами 130 та овоз тўплашга муваффақ бўлган Бразилия терма жамоаси аъзоси 2009 йили Хуан Себастьян Верон томонидан ўрнатилган рекордни (109 та овоз) янгилади.
Сўровномада учинчи ўрин "Сантос"нинг бошқа бир футболчиси — Гансога насиб этган бўлса, Уругвайнинг "Пеньярол" жамоаси ўйинчиси Эхидио Аревало Риос тўртинчи бўлди, дея хабар бермоқда "Sports.ru".
