АПЛ байрамни бошлаб юборди. Байрам бўлмасдан нима, "беш-у ноллар" билан "боксинг дей" га кириб келган "Манчестер Юнайтед" тарихида биринчи марта ўз майдонида сўнгги ўриндаги жамоага ютқазди. Яна қачон, Фергюсоннинг етмиш йиллик юбилейида. Ҳа, майли, бунга анча бўлди. Уёғини эшитинг.
"Астон Вилла"ни қабул қилган "Челси" Дрогбанинг пеналтини аниқ амалга оширишидан сўнг ҳисобда олдинга чиқиб олди. Аммо меҳмонлар тезда ҳисобни тенглаштирдилар. "Челси" аҳволни ўнглаш учун роса ҳаракат қилди, жумладан, Торрес Старрижнинг ўрнига майдонга тушди. Очиғи, Боаш ҳали ҳам аниқ қарорга кела олмаяпти. Гоҳ Торресни туширади, ўхшамасдан, ўрнига майдонга тушган Старриж гол уради. Кейинги ўйинда Старриж асосийда. Бу сафар уники ўхшамайди. Дрогба эса олдингидек эмас. Мана шуларни ўйлаб ўтирганимизда, муаммо ҳимоядан чиқиб ўтирибди. Меҳмонлар ҳужумчиси Бент чалиб йиқитилди, Петров пенальтидан ҳисобни 1:2 га етказди. "Челси" яна олдинга ташланди. Хато навбати эса Лемпардга келди. Кесик тўп узатиш Айрлендга келиб тушди ва у шериги Бент билан биргаликда Чехни доғда қолдиришди 1:3.
Ҳамшаҳарларидан узоқроқ масофага ўзиб кетиш вазифасини яқиндагина юбиляр томонидан "АПЛ нинг энг кучли жамоаси", деб эътироф этилган "Тоттенҳем" ҳам эплай олмади. Уэльсга сафар қилган "тақачилар" ван дер Ваартнинг голидан сўнг ҳисобда олдинда боришаётганди. Аммо ўйин тугашига атиги олти дақиқа қолганда ғалаба қўлдан чиқарилди.
"Арсенал" қийинчилик билан бўлса-да ғалаба қозонди. Ягона гол кимнинг ҳисобига ёзилди? Топдингиз, Робин ван Перси! Ҳаммуаллиф ким? Тополмадингиз, Андрей Аршавин! Биз ҳам бир "руслар ҳақида" шунақа пичинглар қилайлик, қалай бўларкан? Айтганча, бу "Арсенал"нинг Премьер-лигадаги 300-голи экан. Табриклаймиз! Ушбу ғалабадан кейин, "канонирлар" "Челси"ни қувиб ўтдилар ва тўртинчи ўринга жойлашиб олдилар.
Яна бир қизиқарли учрашув "Сток Сити" ва "Уиган" ўртасида бўлиб ўтди. Пастроқдаги протоколни ўқисангиз, ўйин қанчалик қизиқарли бўлганини пайқаш қийин эмас. Қолган ўйинлар ҳам шу ерда.
Эртага, турнинг сўнгги икки учрашуви бўлиб ўтади. "Вест Бромвич" "Эвертон"ни қабул қилса, турнир пешқадами "Манчестер Сити" "Сандерленд" меҳмони бўлади. Энг қизиғи, индинга навбатдаги тур ҳам бошланади. Ундан ҳам қизиғи, бугун майдонга тушган 10 жамоа ўша куни ҳам майдонга тушади.
ЛИВЕРПУЛЬ - НЬЮКАСЛ 3:1 (1:1)
Голлар: Крейг Беллами (30, 67), Стивен Жеррард (78) - Аггер (25-автоол)
31 декабрь. "Энфильд". 44372 томошабин
МАНЧЕСТЕР ЮНАЙТЕД - БЛЭКБЁРН РОВЕРС 2:3 (0:1)
Голлар: Бербатов (52, 63) - Айегбени (16-пен., 51), Ҳанли (80)
31 декабрь. "Олд Траффорд". 75146 томошабин.
АРСЕНАЛ - КУИНЗ ПАРК РЕЙНЖЕРС 1:0 (0:0)
Гол: Робин ван Перси (60)
31 декабрь. "Эмирейтс", 60067 томошабин
БОЛТОН - ВУЛВЕРҲЭМПТОН 1:1 (1:0)
Голлар: Риккетс (22) - С.Флетчер (49)
31 декабрь. "Рибок стейдиум". 29354 томошабин
ЧЕЛСИ - АСТОН ВИЛЛА 1:3 (1:1)
Голлар: Дидье Дрогба (23-пен.) - Айрлэнд (28), С.Петров (83), Даррен Бент (86)
31 декабрь. "Стэмфорд Бриж". 41322 томошабин
НОРВИЧ СИТИ - ФУЛҲЭМ 1:1 (0:1)
Голлар: С.Жексон (90+3) - Орландо Са (7)
31 декабрь. "Керроу Роуд". 26406 томошабин
СТОК СИТИ - УИГАН АТЛЕТИК 2:2 (0:1)
Голлар: Ж.Уолтерс (77), К.Жером (84) - Моусез (45), Б.Уотсон (87-пен.)
31 декабрь. "Британниа Стейдиум". 26595 томошабин
СУОНСИ СИТИ - ТОТТЕНҲЭМ ҲОТСПУР 1:1 (0:1)
Голлар: С.Синклейр (84) - ван дер Ваарт (44)
31 декабрь. "Либерти стейдиум". 20393 томошабин
