Месут Ўзил «Арсенал»даги етти ярим йиллик фаолиятидан сўнг, Туркиянинг «Фенербахче» клубига кўчиб ўтишга қарор қилди.
7 мартдан бери майдонга тушмаётган Ўзил 350 000 евро ҳафталик маошини бекор қилгандан сўнг, турк клубига эркин агент сифатида бориб қўшилади. Ҳали расман икки жамоа томонидан келишув эълон қилинмаган бўлса-да, бу ҳақда Ўзилнинг ўзи гапириб ўтган. У Туркиянинг «НТВ» канали билан уюштириладиган интервью олдидан жуда ҳам ҳаяжонланаётганини ва душанба куни эрталаб Истанбулга етиб боришини айтган.
“Мен «Фенербахче» мухлисиман. Шунинг учун ҳам Туркияга «Фенербаҳче» учун келяпман. Жуда ҳам ҳаяжондаман. Аллоҳ менга «Фенербаҳче» либосини муҳлис сифатида кийишни насиб қилган. Яратганга шукурлар бўлсинки, энди бу либос билан футбол ўйнайман ва клуб учун ҳамма нарса қилишга тайёрман. Бу мен учун шараф”,-деди Ўзил