Айни кунда миллий терма жамоамиз аъзоси Улуғбек Бақоев тўп сураётган БААнинг "Дубай Клаб" футбол клуби бугун БАА Про-лигасининг 10-тур учрашувида Диего Армандо Марадона мураббийлик қилаётган "Ал-Васл" клуби меҳмони бўлди ва 1:2 ҳисобида ғалаба қозонди.
Учрашувнинг 22-дақиқасида меҳмонларнинг гвинеялик легионери Абубакар Камара ҳисобни очган бўлса, орадан 3-дақиқа ўтгач мезбонлардан уругвайлик Хуан Мануэл Оливейра пенальтидан ҳисобни тенглаштирди. Бироқ 36-дақиқада Аббос Атва яна "шаҳарликлар"ни олдинга олиб чиқди ва ўйин сўнгигача ҳисоб ўзгармади.
Қайд этиб ўтиш лозимки, ушбу ғалаба Бақоев тўп сураётган клубнинг жорий мавсумдаги илк муваффақиятидир. Гарчи Улуғбек жароҳат туфайли учрашув қайдномасига киритилмаган бўлса-да, ушбу ғалабадан сўнг "Дубай Клаб" очколари сонини 6 тага етказди ва хафли зонани тарк этиш учун "Аш-Шаржа" клубидан 3 очко ортда қолмоқда.
Турнир жадвалини "Ал-Айн" (29 очко) бошқараётган бўлса, Азиз Ҳайдаров тўп сураётган "Аш-Шабоб" клуби (19 очко) уни таъқиб этмоқда. Бугун айнан бу жамоаларнинг ўзаро учрашуви 1:1 ҳисобида якунланганидан хабарингиз бор.
